Attached
රුපවාහිනී දිතිති තාක්ෂණීකරණය ලෝකයේ රටවලින් 75% ප්‍රමාණයක් සම්පුර්ණ කර ඇති නමුත් ශ්‍රී ලංකාවට අදාළව තවමත් ප්‍රතිපත්තිමය තීරණ ගැනීමෙහි අවස්ථාවෙහි පවතී. එහෙත් ලංකාවේ දිතිති තාක්ෂණීකෘත ගෙවීම් රුපවාහිනී සේවාවන් භාවිත කරන්නන් සහ අන්තර්ජාලය ආශ්‍රිතව වීඩියෝ සේවා පරිහරණය කරන්නන්ගේ ප්‍රමාණය ඉතා ශීඝ්‍රයෙන් වර්ධනය වෙමින් පවතී. තව ද ලංකාවේ පැතලි තිර සහ දිතිති සුසරකිරීම් සහිත රූපවාහිනී යන්ත්‍ර ව්‍යාප්තිය ඉතා ඉහළ අගයක් ගනී. වර්ෂ 1977 දී ශ්‍රී ලංකාවට රූපවාහිනිය හඳුන්වා දීමට පෙර ඒ සඳහා සමාජ විද්‍යාත්මක අධ්‍යයනයක් කළ නමුදු දිතිති තාක්ෂණීකරණය හඳුන්වාදීමට ප්‍රථමයෙන් ඉන් සිදුවන සමාජයික බලපෑම පිළිබඳව අධ්‍යයනයක් සිදු කර නොමැති හෙයින් රූපවාහිනිය බහුමාධ්‍ය උපකරණයක් ලෙස භාවිතයට සැබෑ ග්‍රාහක අවශ්‍යතාවක් පවතින්නේ ද? එම අවශ්‍යතාව කවර සමාජ විද්‍යාත්මක කරුණු පදනම් කොටගෙන ගොඩ නැගෙන්නේ ද? දිතිති තාක්ෂණය මගින් එම අවශ්‍යතාව සපුරාලිය හැක්කේ කෙබඳු ආකාරයෙන් ද? යන ගැටලු වලට පිළිතුරු සපයා ගැනීම මෙම පර්යේෂණයේ අරමුණ වේ. එහෙයින් වර්තමාන ශ්‍රී ලාංකික රූපවාහිනී ග්‍රාහකයා දිතිති තාක්ෂණීකෘත රූපවාහිනී ග්‍රහණය සඳහා ඇති සුදානම සහ එහි අවශ්‍යතාව ද එය ප්‍රමාද වීම මත දේශීය රූපවාහිනී කර්මාන්තය කෙරෙහි ඇති වන බලපෑම ද සමීක්ෂණයක් ආශ්‍රයෙන් අධ්‍යයනය කරන ලදී. ශ්‍රී ලාංකික රූපවාහිනී ග්‍රාහකයින්ගෙන් 40% ක ප්‍රමාණයක් දිතිති තාක්ෂණීකෘත රූපවාහිනී සේවා ලබාගැනීමේ හැකියාවෙන් සමන්විත රූපවාහිනී භාවිත කරන බව සමීක්ෂණ දත්ත ආශ්‍රයෙන් නිරීක්ෂණය විය. ප්‍රේක්ෂක අභිලාෂය සපුරාලීම සඳහා ශ්‍රී ලංකාවේ රූපවාහිනී දීතිති තාක්ෂණික සම්ප්‍රේෂණය ඉතා ඉක්මනින් ආරම්භ කළ යුතුව ඇති බවත් එසේ නොවුණහොත් රූපවාහිනී ග්‍රාහකයින්, ගෙවීම් රූපවාහිනී සේවා සහ අන්තර්ජාල ආශ්‍රිත රූපවාහිනී හා වීඩියෝ ආශ්‍රිත සේවා ග්‍රහණය කිරීමට යොමුවීම හේතුවෙන් දේශීය ව නොමිලයේ නැරඹීය හැකි සේවා පද්ධතිය අඩපණ වනු ඇති බවත් මෙහි නිගමනය වේ. තවද ශ්‍රී ලංකාවට වඩාත් ගැලපෙන අනාගත දිතිති තාක්ෂණීකෘත රූපවාහිනී මාධ්‍යය පුද්ගල, සීමිත සහ පුළුල් විකාශ මුහුන් වූ ආකෘතියක් වන බවට සමීක්ෂණ දත්ත සහ සමාලෝචනයන්වල ප්‍රතිඵල මත නිගමනය කර ඇත.
